تعال و شوف بفراكك شاعاني

إذا حسيت آني امفارگك يوم
تعال و شوف بفراكك شاعاني

وإذا دمعات عينك تنزل ابشوگ
آنا ماضل دمع حتى ابچي ثاني

خلص دمعي وبچيت ابمي العيون
لان اعرف بعد يمك مكاني

أمنيتك تصيح ابصوت أهواك
لان مخلص واعرفك مو أناني

أمنيتك تلمني بحضنك اليوم
وگبل باچر لان رابي ابحناني

لان تعرفني طيب وعشكك موت
رغم غصبا عليه البعد آني

فارگنه الوكت والقسمه والناس
وبقت ذكراتنه اتلحن أغاني

أغاني شگد حزينه اتبچي جلاد
بس امسح دموعك لا تعاني

البس بدلتك وتحنه للناس
وفل شعرك على اعناد الأماني

وما أريدك تلوم ابگلبك الصار
ولا تكول ابتعد عني ونساني

صدگني احبك رغم ما راح
كل الي جنت گاعد اتاني

خليني وحيد آبين ذكراك
وصيح من الزمن آه يا زماني

صح اترك مكان ابگلبك اليوم
بس يكفيك ما صار وكفاني

اتعايش حبيبي ابوقتك الجاي
افرح وضحك وكود التهاني

آلف مبروك واني الي يهنيك
وخليلك شمع فوك الصواني

إذا ضنك ابطل ساعة ذكراك
أرد ارجع واذكرك عل ثواني

عروسه وروحي زفته ... دموعي
وبديه الروحي اكللهه ... دموعي
افتح عيني واني اعرف .. دم وعي
دخليني بديك احلم شويه